ياشينها

[تكفيني الذكرى]

ياشينها لا صرت معجب و ( خجـلان )
...............خوف المصـارح لا يجيـب المطمّـه




[اخاف اصارح بالغلا ( ذاك الإنسـان)
...............و ينقلـب ( جـوو المصـارح مذمّـه)



ويا شينها لا صرت مغرم و ( زعلان )
...............محد ٍ يراضـي قلبـك و ( محـد بيمّـه)



وان رحت محد ٍ قال لك: (وين يافلان)؟
...............روحتك مع جيّتك .. ماهـي مهمّـه



ويا شينها لا صـرت عايـش بحرمـان.
...............مثـل اليتيـم اللـي فقـد شوفـة أمّـه



ماخوذ حقّه وانظلـم شـوف الأعيـان
...............واللي اظلموه (عيـال لحمـه و دمّـه )



ويا شين صاحب دربك(ان صار ثعبـان)
...............لا هو تركـك و لا نفـث فيـك سمّـه



ويا شينهـا لا صـرت تايـه وحيـران
...............وسط الطريق .. و باقي ٍ فيك همّـه



ودّك ترووح .. وآخر الـدرب مـا بـان
...............تخاف تمشـي .. ( ثـم تغشـاك غمّـه )



ويا شينهـا لا صـرت مبلـي ومنهـان
...............والعلـم كلّـه .. مـن اكاذيـب نـمّـه



مـا فيـه ضـدّك لا دلايـل وبرهـاان
...............ودخّـان نـارك مستحـيـل ٍ تشـمّـه



ويا شينها لا صرت مـن روس الاعيـان
...............ثـم تنقلـب فـي نظـرة النـاس رمّـه



ويلااااه يا وقـت ٍ نـوى لـي بعصيـااان
...............أثـر الزمـن يـا نـاس مـا فيـه ذمّـه



ويا شين طرد المقفْي وانت ولهـان
...............ياخـذه شيطـان الغـرور و يخمّـه



الخلْق سجـن وصاحبـك فيـه سجّـان
...............والعلم خال العز .... ( والجـود عمّـه )



ويا شينها .. أصلا بقى شي ما شـان ..؟
...............هـذي الليـالـي طبعـهـا مدلهـمّـه



( ويا زينها ) لا صرت لاهـي و طربـان
...............وحبـل القصايـد يرتجيـك و تلـمّـه



يا ليل دانه .. ليل دانـه .. لا لا .. دان
...............ما فيه ثـوب ٍ يستـر أطـراف كمّـه



يا زينها لا صرت معجـب و خجلان
...............تنثـر علومـك لـو تجيـب المطـمّـه







كُتبت تترجم الاحساس
منقول

.
.

[الريم الظفيري]

ويا شينها لا صرت مـن روس الاعيـان
ثـم تنقلـب فـي نظـرة النـاس رمّـه

ياكبرها عند الله..

جميل مانقلت ياعلي..
نقل يدل على ذائقة رائعه..

[فــردوس الــغــلا]

ويا شينها لا صرت مغرم و ( زعلان )
...............محد ٍ يراضـي قلبـك و ( محـد بيمّـه)

تكفيني الذكرى

ياااااااااااا رب على الذائقة التي تملكها

لله درك رووووووووووعه

حروفك بلسم لجراحنا وفرحة لقلوبنا

ألف شكر

[عذوب الحربي]

يازينها لا صرت معجـب و خجلان

...............تنثـر علومـك لـو تجيـب المطـمّـه

ياحلوها من مطمه......

المهم ينثر علومه .....والباقي كله يهون

تكفيني الذكرى

ذووووق راااقي ....وحس مرهف


تسلم على هذا النقل الرائع

تحياتي

[سدن]

ويا شين صاحب دربك(ان صار ثعبـان)
لا هو تركـك و لا نفـث فيـك سمّـه